حضرت ام البنین(س) - شیعه خلّص(ره)

حضرت ام البنین(س)

ای مدینه عورتلری گلوب هر گجه گونوز داده آغلارام

سو یانیندا لب تشنه جان وئرن اوغلومی سالوب یاده آغلارام

وار یئری اگر عالمه تمام اودلی آهیمیله شرر سالام

نه روادی که گلشنیم سولا ظلم الیله آخِر ملر قالام

وای منه دئیولّر جفائیله کربلاده دوغراندی شیر بالام

یادیمه سالوب بیر به بیر غمین نی کیمی گلوب داده آغلارام

ئولدورنده عبّاسیمی عدو کربلاده صد حیف اولمادیم

غصّه دن خزان یاپراقی کیمی شاخه ی مصیبتده سولمادیم

باش آچوب آنالار کیمی اونون نعشی اوسته من زلف یولمادیم

اود وورار فراق آتشی هر آن بو دل و بو اکباده آغلارام

نار حسرت ازبسکه اود وورار بو یانان دل و جسم و جانیمه

باخبر اولان یوخدی بیر نفر دلده کی بو سرّ نهانیمه

آغلارام سزادی بیر عمر قان تشنه جان وورن نوجوانیمه

شاد اولام چتین بیرده یوز گوله ، تا وارام بو دنیاده آغلارام

بولموسوز ابوالفضلیمی نئجه بیر رشید مه رو جوانیدی

سرو قدّی واقعده زینت باغ گلشن و گلستانیدی

باغریقان بو امّ البنینیده سرو باغینه باغبانیدی

گلمیوبدی گلمز او سرو تک بیرده سرو ایجاده آغلارام

کربلاده عبّاس جان وئروب اوز وفاسینی قیلدی آشکار

فاطمه یانیندا آناسینی ایتمدی قیامتده شرمسار

چکدی داغینی سینمه ولی بیر بالا منه قویدی یادگار

اوخشارام بالامی اودا دئیر دردینی بو ناشاده آغلارام

قویدی اوز یئرینده نشانه سین اوز شبیهی شیرین سخن بالا

واریدی ازلدن رضایتیم جانی شاه دینه فدا اولا

بیر قبیلیه اکتفائیدی گر قالیدی مظلوم کربلا

یادیمه حسین محنتین سالوب متّصل بو مأواده آغلارام

آغلارام حسین تک گلوم سولوب جان وئرونجه من اشک ریزیم

چون اونون وجودی اولوب سبب بیله اهل عالم عزیزیم

یوخ اونا آنالیق لیاقتی گر قبول ائتسه کنیزیم

عزّتیم گئدوبدور، قرا گونه اولموشام من آماده آغلارام

بیرده من حسینسیز وجودیمی عزّتیله همدوش گورنمرم

باشه یتدی عزّتلی گونلریم روزگاریمی خوش گورنمرم

کاش ئولم داخی بو مدینه ده من حسین یئرین بوش گورنمرم

مهربانیدی چون گوزوم قالوب ایمدیده او مولاده آغلارام

اوغلونون عزاسینده آغلاماق گرچه هر آنانین سزاسیدور

لیک اولوم ابوالفضلیمه فدا آغلادان منی بیر وفاسیدور

افتخار امّ البنیندور، دورت بالام حسینین فداسیدور

خدمتیله ایلوبدیلر منی سربلند عقباده آغلارام

بیر گورون بو بی کس آناسینون قلبیده نه اندازه صبری وار

سرّی واردی گوزیاشلی دیده مین بئله بارش همچو ابری وار

کربلا مسافرلری دئیور اوغلومون گوزل خوردا قبری وار

یادیمه دوشور خوردا مرقدی صبر دل گیدور باده آغلارام

خدمتین حسینه تمام ائدوب دلده کی اولان مقصده چاتوب

ایله سرو قامتلی بیر بالام خوردا قبر ایچینده نجه یاتوب

اولمادیم او چولده گورنمدیم هاردا او درخشان مهیم یاتوب

فکر ایدنده حالین غم و محن یوز ویرر بوناشاده آغلارام

کربلاده زینب بئله دئیور بیر مهمّ جنگ اتّفاق دوشوب

اوغلومون اولوب قولّاری قلم، صاق قولی صولوندان قاباق دوشوب

بولمورم ندور سرّی بس اونون قبری قارداشیندان اوزاق دوشوب

تا بدنده روحیم نه قدری وار جور و ظلم بیداده آغلارام

گرچه منله عبّاس آراسینا سالدی بو فلک حسرت وصال

یوخدی چاره امّا دوزم گرک، دوزماقیمدا بیر امردور محال

چونکه روسفید ایلیوب منی امدیقی سودی ایلدیم حلال

باشیمی اوجالدوبدی تا صاقام من اونا هر اثناده آغلارام

صابرم ولی بیرجه نسگیلی اوغلومون منه چوخ گران گلور

حالینه باخاندا یتیمینون دمبدم سرشک روان گلور

یوز دوتور منه سویلوری آنا مهربان بابام بس هاچان گلور

فرقتینده بیکس آتاسینون آغلوری بو شهزاده آغلارام

یوخ سوزوم مدینه خانملاری چوخ اوشاق آنادان یتیم اولی

خلقتینده گر اوز آتاسینا بنزیه اوشاق واردی چوخ یولی

واردی اوغلوم عبّاس تک نه چون بو بالاسینوندا اوزون قولی

هیکل ابوالفضلی گوسترور خلقتی سراپاده آغلارام

«ساعیا» تمام ایت گیلن سوزون طول ویرمه چوخدا کلامه سن

سوز یازاندا آز یاز ولی قوتار وئر همین کلامه ادامه سن

اولسا دیلده هر نه حوائجون عرض قیل شه تشنه کامه سن

دی واریمدی بیر درد قلبیده من او درده اخفاده آغلارام

حاج غلامرضا شیعه خلّص(ره)

برچسبها: ام البنین, حضرت ابوالفضل, شیعه خلّص
هیأت شیفتگان بقیه الله الاعظم(عج) ارومیه...