مدح امیرالمؤمنین(ع) - صالح تبریزی

مدح امیرالمؤمنین(ع)

گینه مین خیالیله سالمشام باشما خیالوی یاعلی

بو امیده برگونی تا گورم او گوزل جمالوی یاعلی

مه و مهر و انجم و آسمان سنیله تاپوب شرف و جلال

سنه کیمسه رتبه و جاهده یته یا برابر اولا محال

بو جهان گئده گله مین جهان سنون اهل معرفت و کمال

ائده جاقدی مایه آبرو صفت کمالوی یاعلی

سنیله حریم ولایته سرکوی وحدته راه وار

در دولتینده شها سنون هامی بی پناهه پناه وار

یئر اوزونده کیمده سنون کیمی بو مقام و حشمت و جاه وار

هامی کیمسه دن حق ائدوب فزون شرف و جلالوی یاعلی

سنیله مُباهی[1] و افتخار صف حور و فوج سروش[2] ایدر

سَیلان مهرویله سنون یَم عشق جوش و خروش ایدر

اولا پای بست کیمسنه هامی عمر حلقه ی گوش ایدر

دُر خاصّ پند و کلاموی گهر مقالوی یاعلی

بو زمانه ده سنه هرکیمون اولا دلده حبّ ولایتی

گئده قبره خوف و غم ایلمز اولی سهل حول قیامتی

سنه دوست سهلیدی دشمنون اولی بی حساب ارادتی

گوره لایزال صفاتوی نبوی خصالوی یاعلی

می ناب عشقوی نوش ائدن اولی می پرست اولی حق پرست

ایله باده نی وورا کیم دله اولی شور عشقوه پای بست

بو نه عشق دور بونه باده دور که ائدوب منی بیله مست مست

هله میل وار گینه نوش ائدم او می زلالوی یاعلی

سنی خلقته سبب ایلیوب کرمیله ما خلق آفرین

هامی دورده اودی دورونه دولانور بئله فلک و زمین

سنون ای خدیو[3] جهانیان گوره مثلوی بو جهان چتین

نئجه بیرده مام جهان سنون گتوره مثالوی یاعلی

یتوروبدی بیت معظّمی شرف و جلاله جلالتون

شرف آرتروب وئروب آبرو هامی پیک حقّه مناعتون[4]

سنی کبریا منش ایلسون یئری وار مقام سیادتون

بو جلالی کیم گوره یاد ائدر حق ذوالجلالوی یاعلی

نه سفینه ی دله بیر زمان یم درد و غمده کناره وار

بیله موج بحر مخوفدن نه منه نجات دوباره وار

هامی درده سندن اولار دوا هامی چاره سیزلره چاره وار

باشیم اوسته لطف ائله تا گوروم اثر ظِلالوی[5] یاعلی

او جلال و عزّت و شأنیله او مقام و شوکت و جاهیله

او گل جمال و جمیلیله او خمار چشم نگاهیله

گهی ماهه دردیوی سویلدون گهی دل دئدون سرچاهیله

دل لاله قانه دونوب گوروب او سرشگ آلیوی یاعلی

سن اوسان که آخدی گوزون یاشی هامی عمر عارض انوره

گئجه گوندوز اوخشیوب آغلادون غم هجر دخت پیمبره

بو جهاندا منشی غم سنون یازا شرح حالوی دفتره

یتوشر تمامه مگر یازا غم و ابتهالوی[6] یاعلی

او پیمبرین قیزی فاطمه که ائدردی زخم دلون رفو

اونا بین درب و جدارده یارا ووردی ثانی کینه جو

گئدوب آرزولرین ایلدون اوزوه شها ئولوم آرزو

حرمونده تا که گورن زمان یارالی عیالوی یاعلی

سنیدون که یار و انیسسیدون هامی عمر درد و بلائیله

سنیدون که عمروی ایلدون سپری فقیر و گدائیله

بو سیادتیله هزار حیف دم تیغ و ظلم و جفائیله

ستم اهلی سالدیلار توپراقا ثمر نهالوی یاعلی

هامی دادیار و طبیبلر سنه وار امید دل الغرض

بر اشارتونله مریضدن اولی دفع هر غم و هر مرض

سنی باغ و راغ[7] بهشتله بو جهاندا ایلمرم عوض

هامی همّتی بودی «صالحین» گوره گل جمالوی یاعلی

صالح تبریزی

برچسبها: حضرت علی, امیرالمومنین, شهادت
هیأت شیفتگان بقیه الله الاعظم(عج) ارومیه...