دیر راهب - یحیوی(ره)

دیر راهب

موسی عصریدی بو عشقیله سینایه چیخوب

یا مسیحادی سرِ داره مصلّایه چیخوب

عجبا رأس حسین نیزه ی بالایه چیخوب

صوت قرآنی تمام عالم اعلایه چیخوب

ائشیدوب راهب دیرانی تماشایه چیخوب

لهجه ی دلکشینه اولدی او باشون مبهوت

قصّه ی کهفی تصوّر ائلیوب قیلدی سکوت

لمعات[1] رخی دنیایه ائدر حقّی ثبوت

گوردی ابواب سماواتیدن اهل ملکوت

وئرمگه عرشه او لمعاتیله پیرایه[2] چیخوب

دئدی سعد اوغلونا رهبان سعادت کردار

که آتامدان منیم اون مین دِرم ارثیّم وار

اونی آل بو باشی وئر بو گئجه اولسون منه یار

چونکه او باشدا هویدادی عجائب اسرار

کشف اعجازیدی مقصودی بو صحرایه چیخوب

مشتری اولدی نصارا شه گردون خدمه

تُف بئله گردش گردونه که قوم ظُلمه

یوسف کاملی ساتدیلا او ناقص دِرمه

دوشمسون مدّعی بو نکته ده هیچ پیچ و خمه

قرعه ی سعد[3] ازل نام نصارایه چیخوب

مرتضی اوغلی قیلوب خانه ی ترسانی بهشت

طشته قویدی او باشی راهب پاکیزه سرشت

قیلدی ممزوج گلاب ، عنبر و مشکی نئچه مَشت[4]

عار اولا خولیه پاک ائتدی توزون پیر کِنشت[5]

کفره باخ عاقبت عیسائیله همپایه چیخوب

پرنیان پرده ی نازکله اونا قیلدی لباس

روی صندوقه قویوب گئچدی گئجه دن نئچه پاس

گوردی وار صومعه ایچره عجب حیرتلی اساس

او باشون دور و برینده قورولوب مجلس یاس

واحسینا سسیدور عرش معلّایه چیخوب

نوح و موسی و مسیحا و خلیل و آدم

پابرهنه باش آچوخ چاک گریبان مُدغم[6]

بیرینون قولتوقینا گیرمیش ایکی قامت خم

بو حسینوندور ایا ختم رسول عالم

کعبه نی ترک ائلیوب سیر کلیسایه چیخوب

انبیالر یارالی باشی ئوپوب ایگلدیلر

قصّه ی مطبخ خولینی عیان ایلدیلر

غایب اولدولا نظردن او مجلّل کیشیلر

نازل اولدی او مقامه گینه بیر فوج دگر

واحسین واولدا صوتی ثریّایه[7] چیخوب

دئدیلر آسیه و مریم و سارادی گلور

هم خدیجه آناسی جدّه سی حوّادی گلور

او جلالی پوزولان حضرت زهرادی گلور

ذکری ایوای اوغول وای اوغول وادی گلور

او قفادن کسیلن باشه مداوایه چیخوب

وای عزیزیم بالا محو اولدی تفاقیم بالاوای

ائتدی خاموش منیم شمر چراغیم بالاوای

هر گئجه سندن اوغول واردی سراغیم بالاوای

گه تنور ایچره گهی دیره قوناقیم بالاوای

کیم سنون تک دئ گوروم بیر بئله سودایه چیخوب

گوزلرون آچدی حسین نطقه گلوب وئردی سلام

خوش گلوبسن منیله صحبته بیچاره آنام

بو کلیسایه منیم گلمگیمه واردی مرام

تاپا رونق گرک ادیان آراسیندا اسلام

بو کسوک باشیم او منظوره بو مأوایه گلوب

صحبت اتمامه یتوب پرده چکیلدی بَصره

یوگوروب راهب خوشبخت سلام ائتدی سره

وئره سن قول شفاعت نولی بو بی هنره

جنّت اهلی آلا ترسانی جناندا نظره

دئیه لر کافره باخ جنّت الاعلایه چیخوب

دئدی قربان سنه بو کافره ترسا جانی

منه تلقین ائله اسلامی تاپوم ایمانی

کلمه ی طیّبه سی مسلم ائدوب رهبانی

ائتدی بو قصّه مسلمان نئچه مین ترسانی

رقعه ی پاک شفاعت اونا عقبایه چیخوب

منیم ابیاتیمی شاها کرم ائت ایله قبول

یَنشِدُ الشاعِرُ فی حَقِّک علی قَدر عُقول

«یحیوی» نوحه یازار مطلبی تا اولسون حصول

حین رؤیاده وئرر حالت رؤیاسینه طول

مقبل[8] و محتشمه[9] تا گوره همسایه چیخوب

یحیوی(ره)[10]

برچسبها: دیر راهب, امام حسین, راهب
هیأت شیفتگان بقیه الله الاعظم(عج) ارومیه...