احوالات حضرت زهرا (س) - فاکر(ره)

احوالات حضرت زهرا (س)

اودم که ترک ایلدی فاطمه بو دنیانی

دوشندی نعشینه آغلار قالان یتیمانی

حسینیله حسن آغلاردی دیلده نسکیلیله

آنایه دردینی زینب دئویردی بو دلیله

سنی نه دللریله اوخشیوم بلالی آنا

یارالی قلبیله ای جان ویرن یارالی آنا

زمانه ده یوزی بیر لحظه گولمین غمدن

جوانلیقیندا اولان قامتی هلالی آنا

گتورمین دیله دردین ئولونجه عالمده

سالان همیشه دله هریتن ملالی آنا

غم فراقه دچار ایلدین یتیملرین

دوشوب خیالیوه بسکه آتان وصالی آنا

بلالی زینبه مشکلدی درد هجرانون

دوزر ننوعی گورنده یئریوی خالی آنا

کیمین سنین کیمی عالمده شوکتی داغیلوب

گیدوب الیندن ایله عزّت و جلالی آنا

کیمین آتاسی ئولندن صورا یانوب قاپوسی

آلوبلا حقّینی بی شرم و دون اهالی آنا

چتیندی بیرده گوله زینبین یوزی سنسیز

گوره زمانه ده خوش گون یوخ احتمالی آنا

سالارئولونجه خیاله مصیبتین آغلار

حیاتینین یتراتمامه ماه و سالی آنا

مگر چیخار بو یادیمدان که ظلم ثانیدن

گوگردی دخترپیغمبرین جمالی آنا

آتام علینین ائیوینده نقدری غم چکدون

گتورمدون غمین اظهاره ای وفالی آنا

همیشه سرور دینه شریک محنتیدون

غمین گورنمزیدون شیر لایزالی آنا

نقدری سن واریدون زینبه فراغتیدی

سن اولماسان اولا راحت چتین خیالی آنا

اوزون گئدوب منی قویدون یرینده محنت کش

ندور اوزوم بولورم امریمین مآلی آنا

دئسم سزادی او موقعده عرض ائدوب زینب

که ای حدیقه ی شرم و حیا نهالی آنا

اورک گوزینده مجسّمدی کربلا دشتی

دوشور حسنینون او صحراده یاده حالی آنا

وورالا اوندا که اود خیمگاهینه دشمن

یاناراود ایچره قالار بیر بولوک عیالی آنا

او گیرو داریده گورزینبین نه حاله قالار

ستمله صید اولی یکسرحرم غزالی آنا

بویاندا جان وئرر عطشان یارالی قارداشیم

باخار فراته اولار العطش مقالی آنا

ئولونجه نسگل اولارزینبه که قارداشمین

گوزونی باغلیان اولماز اولا مجالی آنا

گلوب زمانیه «فاکر» نه دخت زینب تک

مقام و شانیده نه فاطمه مثالی آنا

فاکر(ره)

برچسبها: حضرت فاطمه, حضرت زهرا, حضرت زینب, فاکر
هیأت شیفتگان بقیه الله الاعظم(عج) ارومیه...